స్లోగన్: “విద్యతో విలువ – నైపుణ్యంతో భవిష్యత్”

ఈ సందర్భంగా మంత్రి గారు మాట్లాడుతూ –

108 ఏళ్ల చరిత్ర కలిగిన ఉస్మానియా విశ్వవిద్యాలయం తెలంగాణ గర్వకారణమని, రాష్ట్ర ఆవిర్భావంలో ఈ విశ్వవిద్యాలయం పోషించిన పాత్ర అపూర్వమని గుర్తుచేశారు. గత పదేళ్లలో విశ్వవిద్యాలయాల అభివృద్ధి నిర్లక్ష్యం పాలైందని, కానీ ప్రస్తుత ప్రభుత్వం బాధ్యతలు స్వీకరించిన వెంటనే విశ్వవిద్యాలయాల అభివృద్ధికి చారిత్రాత్మక నిర్ణయాలు తీసుకుందని పేర్కొన్నారు.

ముఖ్యంగా, ఖాళీగా ఉన్న ప్రొఫెసర్ పోస్టుల భర్తీకి అనుమతులు, వసతి గృహాల నిర్మాణం, నాణ్యమైన విద్య అందించడానికి అవసరమైన చర్యలు ప్రారంభించామని తెలిపారు. ప్రభుత్వం లక్ష్యం విద్యార్థులకు కేవలం డిగ్రీలు కాకుండా, నైపుణ్యాలు కల్పించడం అని, ప్రపంచ స్థాయి పోటీలో నిలవడానికి స్కిల్ డెవలప్మెంట్ అత్యవసరమని ఆయన సూచించారు.

డాక్టర్ బి.ఆర్. అంబేద్కర్ గారికి గౌరవ డాక్టరేట్ ప్రధానం చేయడం ఉస్మానియా విశ్వవిద్యాలయ గౌరవాన్ని మరింత పెంచిందని అన్నారు. సంక్షేమ శాఖ నుంచి పేద, బడుగు, బలహీన వర్గాల విద్యార్థులకు అవసరమైన నిధులు మంజూరు చేస్తూ, విద్యా అవకాశాలను విస్తరించడానికి ప్రభుత్వం కృషి చేస్తుందని హామీ ఇచ్చారు.

చివరగా, విద్యార్థులు ఈ అవకాశాన్ని సద్వినియోగం చేసుకొని భవిష్యత్తును నిర్మించుకోవాలని, రాష్ట్ర అభివృద్ధి మీ అభివృద్ధిపైనే ఆధారపడి ఉందని మంత్రి గారు స్పష్టం చేశారు.