ప్రజాస్వామ్య వ్యవస్థకు ఓటే మూల ఆధారం. 

నల్లగొండ  ప్రతినిధి .జనవరి 25 లోకల్ గైడ్ 
నాగార్జున కళాశాల (అటానమస్) ప్రాంగణంలో డా. బి.ఆర్. అంబేడ్కర్ ఓపెన్ యూనివర్సిటీ ఆధ్వర్యంలో జాతీయ ఓటర్ల దినోత్సవాన్ని ఘనంగా నిర్వహించారు. ఈ కార్యక్రమం
యూనివర్సిటీ రీజనల్ కోఆర్డినేటర్ డా. బొజ్జ అనిల్ కుమార్  అధ్యక్షతన జరిగింది.ఈ సందర్భంగా డా. అనిల్ కుమార్ బొజ్జ  మాట్లాడుతూ ప్రజాస్వామ్య వ్యవస్థకు ఓటే మూలాధారమని తెలిపారు. ఓటును అమ్ముకోవద్దని, ఓటు చాలా విలువైనదని, ప్రతి ఒక్కరూ తన ఓటు హక్కును బాధ్యతాయుతంగా, సద్వినియోగం చేసుకోవాలని పిలుపునిచ్చారు. ప్రజల నిర్లక్ష్యం వల్ల ప్రజాస్వామ్యం బలహీనపడే ప్రమాదం ఉందని, అందుకే ప్రతి ఎన్నికలో పాల్గొనడం అత్యంత అవసరమని ఆయన పేర్కొన్నారు.
యువత ఓటు నమోదు ప్రక్రియపై ప్రత్యేకంగా దృష్టి పెట్టాలని, 18 సంవత్సరాలు నిండిన ప్రతి ఒక్కరూ ఓటరు జాబితాలో తమ పేరును నమోదు చేసుకోవాలని సూచించారు.స్వేచ్ఛాయుతమైన, న్యాయమైన ఎన్నికలు జరగాలంటే ప్రతి ఓటు నిజాయితీగా పడాలని, ఎలాంటి ప్రలోభాలకు లోనుకాకుండా ఓటు వేయడం ద్వారా మాత్రమే సమాజంలో మార్పు సాధ్యమవుతుందని అన్నారు.ఈ కార్యక్రమంలో భాగంగా కౌన్సిలర్లు, విద్యార్థులతో ఓటరు ప్రతిజ్ఞ  చేయించారు. రాజ్యాంగ విలువలను గౌరవిస్తూ, దేశ సార్వభౌమత్వం, ప్రజాస్వామ్య పరిరక్షణ కోసం తమ వంతు బాధ్యత నిర్వర్తిస్తామని వారు ప్రతిజ్ఞ చేశారు. ఓటు హక్కు వినియోగం ద్వారా దేశ అభివృద్ధిలో భాగస్వాములు కావాలని  సూచించారు.
జాతీయ ఓటర్ల దినోత్సవం యువతలో ప్రజాస్వామ్య చైతన్యం పెంపొందించేందుకు ఒక ముఖ్యమైన వేదికగా నిలుస్తుందని కార్యక్రమ నిర్వాహకులు తెలిపారు. ఈ కార్యక్రమంలో పెద్ద సంఖ్యలో కౌన్సిలర్లు జాజుల దినేష్, డా అంకుష్, లింగస్వామి, శంకర్, జగదీశ్వర్, శ్రీకాంత్, మహేష్, విద్యార్థులు పాల్గొని విజయవంతం చేశారు.