శ్రీ భద్ర కాళి దేవస్థానంలో 15 రోజుల పాటు జరిగే శాకంభరీ నవరాత్ర మహోత్సవములు

_హనుమకొండ జిల్లా ప్రతినిధి(లోకల్ గైడ్):

చరిత్ర ప్రసిద్ధిగాంచిన వరంగల్ మహానగరంలో భూతల మణిద్వీపంలో విరాజిల్లుతున్న శ్రీ భద్ర కాళి దేవస్థానంలో 15 రోజుల పాటు జరిగే శాకంభరీ నవరాత్ర మహోత్సవములు  నెటి గురువారం నుండి ప్రారంభం కానున్నాయి.  గురువారం రోజున అమ్మవారికి సహస్ర కలశాభిషేకం జరుగుతుంది. ఆ తర్వాత నిత్యాయాగం ప్రారంభమౌతుంది. ఈ యాగాన్నే తిథిమండల దేవతా యజనం అని కూడా అంటారు. మాసంలోని ప్రతి తిథికి జ్యోతిశ్శాస్త్రం ప్రకారం అధిదేవతలున్నట్లే వైదిక స్మార్త శక్తాద్వైత దక్షిణాచార సంప్రదాయాన్ని అనుసరించి ప్రతి తిథికి కాళీ క్రమంలో షోడశి క్రమంలో ఒక్కొక్క అధిదేవత ఉంటుంది. ఈ దేవతలను ఆరాధించడం వల్ల ప్రకృతి సమతౌల్యత దెబ్బతినకుండా ఉండటమే గాక సమస్త మానవాళి సుఖశాంతులతో సకలైశ్వర్యాది. సర్వ సౌభాగ్య సిద్ధిని పొందుతారని ఆగమ శాస్త్రాలు చెబుతున్నాయి. ఈ వదిహేను రోజులు ఉదయం కాళీ క్రమంలో సాయంకాలం శ్రీ (షోడశి) క్రమంలో ఈ నిత్యాయాగం అనగా తిథిమండల దేవతార్చన జరుగుతుంది. దానికనుగుణంగా ఉత్సవ మూర్తులలో గర్భాలయంలోని మూర్తికి కాళీ క్రమాన్ని అనుసరించి స్నపన మండపంలోని మూర్తికి షోడశీక్రమాన్ని అనుసరించి తిథిమండల దేవతా అలంకారాలు జరిపి పూజలు నిర్వహిస్తారు. అనేక మంది భక్తులు ఈ తిథిమండల దేవతా అలంకారాలను, అర్చనలను దర్శించడానికి ఆలయానికి వచ్చి అమితమైన ఆనందాన్ని పొందుతారు. ఆఖరి రోజు ఆషాఢ శుద్ధ పౌర్ణమి రోజున అమ్మవారికి ఉపలభ్యమగు పలు విధములైన శాకములచే అమ్మవారిని శాకంభరిగా అలంకరిస్తారు. ఆ రోజు అమ్మవారిని దర్శించడానికి వేలాదిగా భక్తులు గుడికి పోటెత్తుతారు. ఈ సందర్భంగా ఆలయాన్ని సందర్శించే భక్తుల సౌకర్యార్థం ధర్మకర్తల మండలి విస్తృతమైన ఏర్పాట్లు చేస్తోంది.  ఈ సమావేశానికి ఛైర్మన్ డాక్టర్ శివ సుబ్రహ్మణ్యం, ధర్మకర్తలు  తోనుపునూరి వీరన్న, ఓరుగంటి పూర్ణచందర్, గాదె శ్రవణ్ కుమార్ రెడ్డి,  మోతుకూరి మయూరి, నార్ల సుగుణ, జారతి వెంకటేశ్వర్లు, పాలడుగుల ఆంజనేయులు  అనంతుల శ్రీనివాస్ రావు, ప్రధాన అర్చకులు శ్రీ భద్రకాళి శేషు, ముక్య అర్చకులు పర్నంది నర్సింహా మూర్తి తదితరులు పాల్గొన్నారు.  ఈ సంవత్సరం శాకంభరి ఉత్సవాలలో భక్తులకు  ఎలాంటి ఆసౌకర్యం కలుగకుండా అన్ని ఏర్పాట్లు చేశామని ఆలయ కార్యనిర్వహణాధికారి తెలిపారు.