పఠాన్ చేరు, (లోకల్ గైడ్ ప్రతినిధి కృష్ణ):
హైదరాబాదు లోని గీతం స్కూల్ ఆఫ్ సైన్స్, రసాయన శాస్త్ర విభాగం పరిశోధక విద్యార్థి దుర్గావరప్రసాదు బొట్లా డాక్టరేట్ కు అర్హత సాధించారు. ‘ట్రయాజోలో/ఆక్సాడియాజో లో-లింక్డ్ హైబ్రిడ్ హెటెరోసైక్లిక్ స్కాఫోల్డ్ ల రూపకల్పన, సంశ్లేషణ, జీవసంబంధమైన మూల్యాంకనం’ చేసి, ఆయన సిద్ధాంత వ్యాసాన్ని సమర్పించారు. ఈ పరిశోధనకు మార్గదర్శనం వహిస్తున్న గీతం స్కూల్ ఆఫ్ సైన్స్ రసాయన శాస్త్ర విభాగం అసోసియేట్ ప్రొఫెసర్ డాక్టర్ శివకుమార్ కొప్పుల శుక్రవారం విడుదల చేసిన ప్రకటనలో ఈ విషయాన్ని వెల్లడించారు. ఈ పరిశోధన సంభావ్య క్యాన్సర్ నిరోధక, యాంటీ బాక్టీరియల్ అనువర్తనాలతో నూతన హెటెరోసైక్లిక్ సమ్మేళనాలను అభివృద్ధి చేయడంపై దృష్టి సారించినట్టు తెలియజేశారు. ఈ అధ్యయనంలో పిరిమిడిన్లు, థియాజోల్స్, ట్రయాజోల్స్, ఆక్సాడియాజోల్స్ వంటి ఔషధపరంగా ముఖ్యమైన నిర్మాణాలను కలిగి ఉన్న అనేక హైబ్రిడ్ హెటెరోసైక్లిక్ అణువుల సంశ్లేషణ, జీవ మూల్యాంకనం ఉన్నాయన్నారు. ఈ అధ్యయనం రొమ్ము (ఎంసీఎఫ్-7), ఊపిరితిత్తుల (ఏ-549) క్యాన్సర్ కణ తంతువులకు వ్యతిరేకంగా ఆశాజనకమైన ఇన్-విట్రో క్యాన్సర్ వ్యతిరేక చర్యను ప్రదర్శించే కొత్త సమ్మేళనాల అభివృద్ధికి దారితీసిందని, కొన్ని ప్రామాణిక మందులతో పోలిస్తే మెరుగైన సైటోటాక్సిసిటీని చూపించినట్టు తెలిపారు. ఈ పరిశోధన మానవ వ్యాధికారక బ్యాక్టీరియాకు వ్యతిరేకంగా బలమైన యాంటీ బాక్టీరియల్, బయోఫిల్మ్-నిరోధక లక్షణాలతో కూడిన సమ్మేళనాలను, సాల్మొనెలా టైఫిమురియం, ఎస్చెరిచియా కోలికి వ్యతిరేకంగా గుర్తించదగిన కార్యకలాపాలను కూడా గుర్తించినట్టు వివరించారు. క్యాన్సర్ నిరోధక, యాంటీ బాక్టీరియల్ ఔషధ ఆవిష్కరణలో చికిత్సా ఏజెంట్లుగా మరింత అభివృద్ధి చెందడానికి కొత్తగా సంశ్లేషణ చేసిన హైబ్రిడ్ హెటెరోసైక్లిక్ స్కాఫోల్డ్ ల సామర్థ్యాన్ని ఈ పరిశోధనలు ఎలుగెత్తి చాటాయన్నారు. డాక్టర్ బొట్లా సిద్ధాంత వ్యాసం పీహెచ్.డీ. పట్టాకు అర్హత సాధించడం పట్ల గీతం హైదరాబాదు అదనపు ఉపకులపతి ప్రొఫెసర్ డీ.ఎస్.రావు, గీతం రెసిడెంట్ డైరెక్టర్ డీవీవీఎస్ఆర్ వర్మ, స్కూల్ ఆఫ్ సైన్స్ ప్రిన్సిపాల్ డాక్టర్ ఎం.రెజా, రసాయన శాస్త్ర విభాగాధిపతి డాక్టర గౌసియా బేగం, పలు విభాగాల అధిపతులు, అధ్యాపకులు, సిబ్బంది తదితరులు అభినందించినట్టు ఆ ప్రకటనలో పేర్కొన్నారు.
