సైబరాబాద్, (లోకల్ గైడ్ ప్రతినిధి కృష్ణ):
శాంతిభద్రతల పరిరక్షణతో పాటు సామాజిక బాధ్యతల లోను పోలీసులు ముందుంటారని జీడిమెట్ల పోలీసులు మరోసారి నిరూపించారు. మానసిక సమస్యతో బాధపడుతున్న 26 ఏళ్ల యువకుడికి తల్లిదండ్రుల విజ్ఞప్తి మేరకు తక్షణ సహాయం అందించి మానవత్వాన్ని చాటుకున్నారు. యువకుడి పరిస్థితిని గమనించిన పోలీసులు ముందుగా అతనికి కౌన్సిలింగ్ నిర్వహించారు. అనంతరం తమ వాహనంలోనే యువకుడిని హైదరాబాద్లోని ఇన్స్ ట్యూట్ ఆఫ్ మెంటల్ హెల్త్ కు తరలించారు. అక్కడ అడ్మిషన్ ప్రక్రియను పూర్తి చేయించి, అతనికి మెరుగైన వైద్యసేవలు అందేలా వైద్య బృందాన్ని అభ్యర్థించారు. ప్రజల కష్టాలలో భాగస్వాములు కావాలని సిపి రమేష్ రెడ్డి ఆదేశాల మేరకు ఈ చర్యలు చేపట్టినట్లు పోలీసులు తెలిపారు. ఆపద సమయంలో అండగా నిలిచిన పోలీసుల సేవలను యువకుడి కుటుంబ సభ్యులు ప్రశంసిస్తూ హర్షం వ్యక్తం చేశారు. సామాజిక బాధ్యతలో భాగంగా జీడిమెట్ల పోలీసుల ఈ సేవా కార్యక్రమం స్థానికంగా ప్రశంసలు అందుకుంటోంది.
