శేరిలింగంపల్లి, (లోకల్ గైడ్ ప్రతినిధి కృష్ణ):
శేరిలింగంపల్లి జిహెచ్ఎంసి మున్సిపల్ కార్యాలయంలో శుక్రవారం అవినీతి నిరోధక శాఖ (ఏసీబీ) అధికారులు ఆకస్మిక సోదాలు నిర్వహించారు. ఏసీబీ డీఎస్పీ ఆనంద్ కుమార్ నేతృత్వంలో అధికారులు ఐదు బృందాలుగా విడిపోయి కార్యాలయంలోని పలు విభాగాలలో తనిఖీలు చేపట్టారు. ప్రధానంగా టౌన్ ప్లానింగ్ విభాగంపై ఏసీబీ అధికారులు ప్రత్యేకంగా దృష్టి సారించినట్లు సమాచారం. భవన అనుమతులు, లేఅవుట్ ఆమోదాలు, ఫైళ్ల ప్రాసెసింగ్లో అవినీతి ఆరోపణలు ఉన్న నేపథ్యంలో సంబంధిత ఫైళ్లు, రికార్డులు, కంప్యూటర్ డేటాను అధికారులు పరిశీలిస్తున్నారు. కార్యాలయంలో ఉన్న అధికారుల వివరాలు సేకరించడంతో పాటు పలు కీలక పత్రాలను కూడా స్వాధీనం చేసుకున్నట్లు తెలిసింది. కొంతకాలంగా టౌన్ ప్లానింగ్ విభాగంలో అవకతవకలు జరుగుతున్నాయనే ఫిర్యాదుల నేపథ్యంలోనే ఈ సోదాలు నిర్వహిస్తున్నట్లు సమాచారం. ఏసీబీ తనిఖీలతో జిహెచ్ఎంసి కార్యాలయంలో ఉద్రిక్త వాతావరణం నెలకొనగా, అధికారులు సోదాలు పూర్తి చేసిన అనంతరం పూర్తి వివరాలు వెల్లడించే అవకాశం ఉంది.
.jpg)
