(లోకల్ గైడ్):అధ్యక్షుడు డొనాల్డ్ ట్రంప్, రష్యా అధ్యక్షుడు వ్లాదిమిర్ పుతిన్ ఈ నెల 15న అలాస్కాలో భేటీ కానున్న విషయం ఇప్పటికే ప్రపంచవ్యాప్తంగా చర్చనీయాంశమైంది. ఈ చారిత్రక సమావేశం ఉక్రెయిన్ యుద్ధానికి ముగింపు పలకడంలో కీలక మలుపు కానుందని ఆశలు వ్యక్తమవుతున్నాయి.
ఈ పరిణామంపై భారత విదేశాంగ శాఖ అధికారికంగా స్పందించింది. “అమెరికా మరియు రష్యా ఫెడరేషన్ అలాస్కాలో సమావేశమయ్యేందుకు ముందుకు రావడాన్ని ఇండియా స్వాగతిస్తోంది. ఇలాంటి చర్చలు ప్రపంచంలో శాంతి, స్థిరత్వానికి దోహదం చేస్తాయి. ముఖ్యంగా ఉక్రెయిన్లో జరుగుతున్న యుద్ధానికి ముగింపు పలకడానికి ఇది ఒక అవకాశంగా మారవచ్చు,” అని విదేశాంగ శాఖ ప్రకటించింది.
ప్రకటనలో ప్రధాని నరేంద్ర మోదీ పలుమార్లు చేసిన వ్యాఖ్యలను కూడా గుర్తు చేసింది. “ఇది యుద్ధాల యుగం కాదు” అన్న మోదీ మాటలు ప్రపంచ నాయకులకు స్పష్టమైన సందేశం అని విదేశాంగ శాఖ పేర్కొంది. దేశాల మధ్య విభేదాలను చర్చల ద్వారానే పరిష్కరించుకోవాలని భారత్ ఎల్లప్పుడూ ప్రోత్సహిస్తోందని స్పష్టం చేసింది.
ఉక్రెయిన్ యుద్ధం ప్రారంభమైనప్పటి నుంచి భారత్ తటస్థ ధోరణి పాటిస్తూ, అన్ని పక్షాల మధ్య సంభాషణకు మద్దతు ఇస్తోంది. మానవతా సహాయం, ఆర్థిక సహకారం వంటి అంశాల్లో ఉక్రెయిన్కు మద్దతు ఇవ్వడమే కాకుండా, రష్యాతోనూ సంబంధాలను కొనసాగిస్తోంది.
ప్రపంచ శాంతి, భద్రత కోసం ఇలాంటి ఉన్నతస్థాయి చర్చలు జరగడం అవసరమని భారత్ అభిప్రాయపడింది. ట్రంప్-పుతిన్ భేటీ ఫలప్రదమై, ఉక్రెయిన్ సమస్యకు శాశ్వత పరిష్కారం దొరకాలని భారత్ ఆశాభావం వ్యక్తం చేసింది.
ఈ సమావేశంపై ప్రపంచ దృష్టి అలాస్కాపైనే కేంద్రీకృతమవగా, ఈ చర్చలు యుద్ధానికి ముగింపు పలకడమే కాకుండా, భవిష్యత్తులో అమెరికా-రష్యా సంబంధాల దిశను కూడా నిర్ణయించనున్నాయని విశ్లేషకులు భావిస్తు
న్నారు.
About The Author
