సైబరాబాద్, (లోకల్ గైడ్ ప్రతినిధి కృష్ణ):
మియాపూర్ పోలీస్ స్టేషన్ పరిధిలో జరిగిన ఇంటి దొంగతనాన్ని పోలీసులు చాకచక్యంగా ఛేదించి నిందితురాలిని అరెస్ట్ చేసి దొంగిలించిన బంగారు ఆభరణాలను స్వాధీనం చేసుకున్నారు. హఫీజ్పేట్లోని ఆదిత్య ఇంపీరియల్ అపార్ట్మెంట్లో నివసిస్తున్న శ్వేతా అక్కేనపల్లి అనే ప్రైవేట్ ఉద్యోగి 2026 ఫిబ్రవరి 14న సాయంత్రం తన ఇంట్లో ఉంచిన సుమారు 60 గ్రాముల బంగారు ఆభరణాలు, రూ.4000 నగదు కనిపించకుండా పోయినట్టు మియాపూర్ పోలీస్ స్టేషన్లో ఫిర్యాదు చేశారు. తమ ఇంటికి ప్రతిరోజూ శుభ్రపరిచే పనుల కోసం వచ్చే పనిమనిషిపైనే అనుమానం ఉన్నట్లు ఆమె పోలీసులకు తెలిపింది. ఫిర్యాదు ఆధారంగా కేసు నమోదు చేసిన పోలీసులు ఇంట్లో ఉన్న సీసీటీవీ ఫుటేజీని పరిశీలించి దొంగతనానికి పాల్పడిన పనిమనిషిని గుర్తించారు. అనంతరం న్యూ కాలనీ, ఓల్డ్ హఫీజ్పేట్ ప్రాంతంలో నివసిస్తున్న నిందితురాలిని అదుపులోకి తీసుకుని విచారణ జరిపారు. విచారణలో ఆమె సులభంగా డబ్బు సంపాదించాలనే ఉద్దేశంతో పనిచేసే ఇంట్లోనే బంగారు ఆభరణాలను దొంగిలించినట్లు ఒప్పుకుంది. ఆమె వద్ద నుండి హారం, నల్లపూసల గోల్డ్ చెయిన్, బ్రాస్లెట్, చెవి రింగులు సహా మొత్తం దొంగిలించబడిన ఆభరణాలను పోలీసులు స్వాధీనం చేసుకున్నారు.
ఇళ్లలో పని చేసుకునే వ్యక్తులను నియమించే ముందు వారి వివరాలను ధృవీకరించు కోవాలని, అపార్ట్మెంట్లలలో తప్పనిసరిగా సీసీటీవీ కెమెరాలు ఏర్పాటు చేసుకోవాలని, అనుమానాస్పద వ్యక్తులు లేదా చర్యలు కనిపిస్తే వెంటనే పోలీసులకు సమాచారం ఇవ్వాలని మియాపూర్ పోలీసులు ప్రజలకు సూచించారు.
